Алдан. Оҕолорго уонна эр дьоҥҥо оройуон хапсаҕайга чемпионата ыытыллан түмүктэннэ. Күрэхтэһии, аны сайын Горнайга буолар Манчаары спартакиадатыгар сүүмэрдиир сыаллаах-соруктаах ыытылынна. Күрэхтэһиини Алдан оройуонун спортивнай тустууга федерацията (толорооччу дириэктэр Трофимов П.С.) уонна оройуон дьаһалтата (баһылык Поздняков С.Н.) тэрийэн ыыттылар.
Хапсыһыылар кулун тутар 21-20 күннэригэр Алдан куорат хайыһардьыттары бэлэмниир республикатааҕы киинин саалатыгар тэрилиннилэр. Күрэхтэһии бастыҥ хапсыһыытынан эр дьоҥҥо 75 кг финала буолла. Олус тыҥааһыннаах хапсыһыыга эдэр кэскиллээх бөҕөс, Р.Д. Дмитриев аатынан Олимпийскай эрэл училищетын үөрэнээччитэ Антон Хурасев – самбоҕа Россия чемпионун, опыттаах Руслан Туркан-Суриновиһы кыайыыта буолла (хаартыскаҕа пьедесталга тураллар).
Түмүккэ ыйааһыннарыгар бастаабыттар – Манчаары спартакиадатыгар кыттар быраабы ыллылар. Спартакиадаҕа бэлэмнэнии чэрчитинэн оҕолорго бастаабыттар кулун тутар 26 күнүгэр Дьокуускайга буолар “Эрчимэн Бэргэн” хапсаҕайга республикатааҕы күрэхтэһиигэ кыттыахтара.
Оройуоҥҥа хапсаҕайга күрэхтэһиини бу иккис ыытааһыммыт. Бастакы күрэхтэһиигэ 30-ча кыттааччы буоллаҕына, билигин 76 буолла. Итинтэн киһи үөрэр-астынар эрэ. Киһи кэрэхсиирэ диэн, күрэхтэһиигэ – оройуон көҥүл тустууга, самбоҕа уонна дзюдоҕа эрчиллэр оҕолоро, ДЮСШ иитиллээччилэрэ бары кытыннылар.
Күрэхтэһии бастыҥ арбитрынан Енохов О.В. (Хатыыстыыр) ааттанна. Чемпионнар уонна призердар мэтээлинэн, грамотанан уонна сыаналаах бириистэринэн наҕараадаланнылар: (1 м – 1500, 2 м – 1000, 3 м – 500 солк.).
Санатан эттэххэ, Алдан оройуонуттан үгүс биллэр хапсаҕайдьыттар уонна тустууктар үүнэн тахсыбыттара. Ол курдук, хапсаҕайга Манчаары спартакиадатын икки төгүллээх кыайыылааҕа Семен Максимов (Кутана), көҥүл тустууга норуоттар икки ардыларынааҕы кылаастаах спорт маастара Алексей Соловьев (Кутана), Россия чемпионатын үрүҥ көмүс призера Антон Иванов (Хатыыстыыр) уо.д.а. төрөөбүт дойдуларын ааттаппыттара. Кинилэр кыайыылаах суолларын салгыыр оҕолор, ыччаттар билигин да бааллар.
Түһүлгэ түмүк көрдөрүүтэ:
Уолаттар (2003 с. диэри төрөөбүттэр)
50 кг 1. Диодоров Л. (Кутана), 2. Нуждин В. (Хатыыстыыр), 3. Петров В. (Угайаан).
55 кг 1. Роик Т. (Аллараа Кураанах), 2. Жуков Е. (Алдан), 3. Поминов Д. (Аллараа Кураанах).
62 кг 1 Авелов Ю. (Угайаан), 2. Федоров И. (Кутана), 3. Охлопков М. (Хатыыстыыр).
70 кг 1 Романов В. (Кутана), 2. Фельдбуш С., 3. Романов В. (иккиэн – Алдан).
+70 кг 1. Ефремов В. (Угайаан), 2. Платонов А., 3. Григорьев В. (иккиэн – Кутана).
Эр дьоҥҥо:
57 кг 1. Степанов М., 2. Авелов М. (иккиэн – Хатыыстыыр).
65 кг 1. Янулов Б. (Хатыыстыыр), 2. Давронов Д. (Алдан), 3. Стручков В. (Кутана).
75 кг 1. Хурасев А. (Хатыыстыыр), 2. Туркан-Суринович Р., 3. Гриневич С. (иккиэн – Алдан).
85 кг 1. Губкин А. (Алдан), 2. Минеев С., 3. Торопов Е. (иккиэн – Аллараа Кураанах).
95 кг 1. Вершинин А., 2 Колода К. (иккиэн – Алдан).
+95 кг 1. Шкарубо Д., 2. Ерошенко И., 3. Попов Г. (үһүөн – Алдан).
